Prokuroria Themelore në Pejë ka hapur rast penal ndaj këngëtarit nga Shqipëria, Jozefin Marku, lidhur me incidentin e dhunshëm ndaj kosovarit Eduard Kuçi.
Zëdhënësi i Prokurorisë Themelore në Pejë ka bërë të ditur se rasti është iniciuar me vetiniciativë nga prokurori kujdestar, për veprën penale “Lëndim i lehtë trupor”.
“Prokurori i Shtetit nga Prokuroria Themelore në Pejë, përkatësisht prokurori kujdestar, me vetiniciativë ka hapur rast penal ndaj J.M., shtetas i Republikës së Shqipërisë, për veprën penale ‘Lëndim i lehtë trupor’, të shkaktuar ndaj shtetasit të Republikës së Kosovës, E.K.”, thuhet në përgjigjen e Prokurorisë.
Sipas Prokurorisë, Policia e Kosovës është autorizuar për inicimin e rastit, vendosjen e të dyshuarit në “stop list” dhe ndërmarrjen e veprimeve të tjera ligjore.
“Stop list”, nënkupton një listë e personave që duhet të ndalohen dhe kontrollohet në kufi, sapo të futen në territorin e Kosovës, për të vazhduar tutje me procedurat.
“Veprimet janë ndërmarrë nga dispozitat ligjore të nenit 109 të Kodit Penal të Republikës së Kosovës, i cili zbatohet ndaj cilitdo person të huaj i cili ka kryer veprën penale jashtë territorit të Republikës së Kosovës ndaj shtetasit të saj”, ka njoftuar më tej Prokuroria e Shtetit.
Ndërkohë, në pamjet e publikuara shihen momente të rënda të përleshjes, ku Edi shihet i rrahur keq, i kërkon Jozit të ndalojë. Megjithatë, përleshja vazhdon edhe për disa momente.
Aty shihet se këngëtari nga Shqipëria i doli në pritë Kuçit, bashkë me disa persona tjerë, disa prej tyre të maskuar, dhe e sulmuan fizikisht kosovarin i cili po udhëtonte me veturë dhe u ndalua nga një pjesëtari i bandës që mbante një shenjë “STOP” të Policisë shqiptare.
Vetë Edi kishte publikuar më herët një fragment të përleshjes në InstaStory, duke e shoqëruar me mbishkrimin: “Pabesia dhe tradhtia kanë rrëzuar edhe mbretër! 15 me 1 në konakun e tyre! Shikim të këndshëm”.
(Unaza Online)