Sëmundjet jo të transmetueshme, përfshirë sëmundjet e zemrës, kancerin, diabetin dhe sëmundjet kronike të frymëmarrjes, janë në qendër të një fushate të re globale të Organizatës Botërore të Shëndetësisë.
Siguria e pacientëve që jetojnë me sëmundje kronike do të jetë në fokusin e Ditës Botërore të Sigurisë së Pacientëve 2026, e cila do të shënohet më 17 shtator.
Organizata Botërore e Shëndetësisë e ka vendosur këtë vit në qendër temën “Safe care for noncommunicable diseases”, duke vënë theksin te kujdesi i sigurt për personat që jetojnë me sëmundje jo të transmetueshme.
Në këtë kategori përfshihen sëmundje si sëmundjet kardiovaskulare, kanceri, diabeti dhe sëmundjet kronike të frymëmarrjes. Ato shpesh kërkojnë trajtim afatgjatë, kontrolle të vazhdueshme dhe bashkëpunim të ngushtë mes pacientit dhe profesionistëve shëndetësorë.
Sipas OBSH-së, rreth një në dhjetë pacientë dëmtohet gjatë marrjes së kujdesit shëndetësor, ndërsa rreth gjysma e këtyre dëmeve konsiderohen të parandalueshme.
Pikërisht për këtë arsye, organizata kërkon që sistemet shëndetësore të përmirësojnë mënyrën se si trajtohen pacientët me sëmundje kronike dhe të reduktojnë rreziqet gjatë procesit të kujdesit.
OBSH thekson gjithashtu se pacientët nuk duhet të jenë vetëm marrës të trajtimit, por partnerë aktivë në kujdesin për shëndetin e tyre. Komunikimi i mirë mes mjekut dhe pacientit, ndjekja e trajtimit dhe informimi i qartë janë pjesë e rëndësishme e këtij procesi.
Fushata e vitit 2026 synon të rrisë ndërgjegjësimin për faktin se siguria e pacientit nuk lidhet vetëm me trajtimin e sëmundjes, por edhe me mënyrën se si ofrohet kujdesi gjatë gjithë rrugëtimit shëndetësor.
Ekspertët shëndetësorë vazhdojnë të theksojnë rëndësinë e kontrolleve të rregullta, parandalimit dhe konsultimit me profesionistët e shëndetësisë, veçanërisht për personat që kanë sëmundje kronike.
(Unaza Online)