Pas përfundimit të aventurës me serialin “Veliaht”, aktori i njohur turk Akın Akınözü po përgatitet për një tjetër rol të rëndësishëm në televizion, transmeton gazeta “Unaza Online”.
Aktori do të jetë protagonist i serialit të ri historik “Aşk ve Taht”, një produksion i Bozdağ Film që pritet të transmetohet në ATV.
Këtë herë, Akınözü do të largohet nga personazhet moderne dhe do të mishërojë një figurë të rëndësishme të historisë së Anadollit: Sulltanin I. Alâeddin Keykubad, një prej sundimtarëve më të njohur të Shtetit Selxhuk të Anadollit.
Projekti ka tërhequr vëmendjen që në fazat e para të përgatitjes, jo vetëm për historinë dhe përmasat e produksionit, por edhe për transformimin e Akınözü për këtë rol. Pamjet e para dhe imazhi i ri i aktorit kanë nisur të qarkullojnë në mediat turke dhe në rrjetet sociale.
Një tjetër detaj që ka ngjallur interes është partnerja e tij në serial. Aktorja boshnjake Merjem Šiljak është zgjedhur për rolin e Destinës, princeshës së Alanyas, e cila në rrjedhën e historisë lidhet me Sulltan Alaeddin Keykubad. Ajo do të përballet me një nga rolet e saj më të mëdha në televizionin turk.
Me një histori që ndërthur pushtetin, dashurinë, intrigat e pallatit dhe betejat, “Aşk ve Taht” synon të jetë një prej produksioneve të rëndësishme të sezonit të ri televiziv në Turqi.
Për Akın Akınözu, ky projekt shënon një tjetër kthesë në karrierë dhe një mundësi për t’u shfaqur para publikut në një version krejtësisht të ri, pas suksesit të tij në seriale si “Hercai” dhe “Veliaht”.
(Unaza Online)