Një studim i ri nga UNC Health ka sjellë të dhëna inkurajuese për një mënyrë ushqyerjeje të bazuar në parimet e dietës mesdhetare. Sipas studiuesve, personat që ndoqën një plan të përshtatur të këtij modeli ushqyerjeje arritën jo vetëm të menaxhonin më mirë peshën, por edhe të përmirësonin cilësinë e përgjithshme të dietës, transmeton gazeta “Unaza Online”.
Modeli mesdhetar i ushqyerjes përfshin në mënyrë të theksuar frutat, perimet, drithërat integrale, bishtajoret, arrorët dhe yndyrnat e shëndetshme, ndërsa kufizon ushqimet me përmbajtje të lartë të yndyrave të ngopura dhe sheqernave të shtuara.
Ekspertët theksojnë se një nga avantazhet e këtij modeli është fleksibiliteti. Nuk bëhet fjalë për eliminimin e plotë të grupeve ushqimore, por për krijimin e një balance më të mirë dhe për zgjedhje më të shëndetshme në përditshmëri.
Studimi rikthen në vëmendje rëndësinë e cilësisë së ushqimit dhe jo vetëm të numërimit të kalorive. Një dietë e qëndrueshme, e pasur me ushqime të plota dhe me bazë bimore, mund të jetë më e lehtë për t’u ndjekur në afat të gjatë.
(Unaza Online)