Meta po përgatitet të lançojë “Hatch”, një platformë të re të bazuar në inteligjencën artificiale që do të fokusohet te AI agents — sisteme që mund të kryejnë detyra për përdoruesin në mënyrë më autonome, në vend që vetëm t’u përgjigjen pyetjeve. Sipas The Information, platforma pritet të prezantohet në javët e ardhshme, transmeton gazeta “Unaza Online”.
Ideja pas agjentëve të AI është që përdoruesi të mos ketë nevojë t’i japë sistemit udhëzime për çdo hap. Për shembull, një agjent mund të jetë në gjendje të planifikojë një aktivitet, të kërkojë informacion, të krahasojë alternativa dhe të kryejë disa veprime njëri pas tjetrit.
Kjo tregon se gara mes kompanive të mëdha teknologjike po kalon gradualisht nga chatbotët tradicionalë drejt sistemeve që mund të veprojnë vetë. Meta tashmë po investon fuqishëm në AI dhe ka publikuar edhe modele të reja që mund të përdoren nga zhvilluesit.
Nëse Hatch arrin të funksionojë sipas objektivave të kompanisë, mund të ndikojë në mënyrën se si njerëzit përdorin telefonat, aplikacionet dhe shërbimet online. Në vend që të hapësh disa aplikacione për të kryer një detyrë, një agjent AI mund të bëhet ndërmjetësi që i koordinon këto veprime.
(Unaza Online)