Bukuria në vitin 2026 po largohet nga rutinat e komplikuara dhe po i rikthehet kujdesit më të thjeshtë dhe të qëndrueshëm për lëkurën. Një nga tendencat që po fiton vëmendje është “skinimalism” – përdorimi i më pak produkteve, por me përbërës më të dobishëm dhe funksione të shumëfishta, transmeton gazeta “Unaza Online”.
Në vend të shtresimit të shumë serumeve dhe kremrave, fokusi po vendoset te hidratimi, mbrojtja nga dielli dhe forcimi i barrierës natyrore të lëkurës. Ekspertët e industrisë së bukurisë vërejnë gjithashtu një rikthim të përbërësve të njohur si retinoli dhe vitamina C, por në formula të reja që synojnë të jenë më të buta dhe më efektive.
Një tjetër drejtim i fortë i verës 2026 është pamja “glow”, pra lëkurë që duket e hidratuar, e freskët dhe me shkëlqim natyral, në vend të një make-up-i të rëndë. Produktet që kombinojnë kujdesin për lëkurën me efektin kozmetik po bëhen gjithnjë e më të kërkuara.
Mbrojtja nga dielli mbetet gjithashtu një prej pikave kryesore të rutinës së bukurisë. Tendencat e reja po e trajtojnë SPF-në si pjesë të përditshme të kujdesit për lëkurën, jo vetëm si produkt që përdoret gjatë pushimeve verore.
(Unaza Online)