Industria e bukurisë po i kushton gjithnjë e më shumë vëmendje grave me lëkurë të pjekur. Sipërmarrësja e industrisë së bukurisë Sarah Creal, e cila ka punuar për më shumë se tri dekada në kompani si Estée Lauder dhe ka bashkëpunuar me emra si Tom Ford dhe Victoria Beckham, ka krijuar markën Sarah Creal Beauty, të orientuar veçanërisht drejt grave 40+, transmeton gazeta “Unaza Online”.
Ideja lindi nga një problem që Creal thotë se e ka vërejtur në industrinë e kozmetikës: shumë produkte janë konceptuar duke pasur parasysh lëkurën më të re dhe nuk marrin gjithmonë parasysh ndryshimet që ndodhin me moshën, si vijat e holla, ndryshimi i elasticitetit apo qepallat më të rënda.
Para lançimit të markës, Creal konsultoi rreth 2,000 gra për të kuptuar më mirë problemet që hasin gjatë përdorimit të makeup-it. Produktet e saj përfshijnë, ndër të tjera, një laps për sytë dhe një concealer të dizajnuar për lëkurë të pjekur.
Marka ka pasur një fillim të fortë komercial: sipas Financial Times, ajo ka arritur rreth 10 milionë dollarë të ardhura në vitin e parë dhe po synon zgjerim ndërkombëtar.
(Unaza Online)