Serbia pritet të zhvillojë zgjedhje të parakohshme parlamentare më 18 ose 25 tetor 2026, ka bërë të ditur presidenti Aleksandar Vuçiç, transmeton gazeta “Unaza Online”.
Vendimi vjen pas muajsh të tërë protestash antiqeveritare në vend. Data përfundimtare pritet të përcaktohet në ditët në vijim.
Zgjedhjet parlamentare normalisht ishin planifikuar për dhjetor të vitit 2027, por kriza e gjatë politike dhe protestat kanë shtyrë autoritetet drejt një procesi të parakohshëm zgjedhor.
Protestat u përshkallëzuan pas shembjes së një strehe në stacionin hekurudhor të Novi Sadit në nëntor 2024, ku humbën jetën 16 persona. Lëvizja e protestave është udhëhequr në masë të madhe nga studentët dhe është shoqëruar me kërkesa për përgjegjësi, luftë kundër korrupsionit dhe reforma institucionale.
Vuçiç nuk ka dhënë ende një datë konkrete për zgjedhjet presidenciale, ndërsa skenari politik mbetet i hapur. Analistët vlerësojnë se edhe pas zgjedhjeve të ardhshme, Vuçiç mund të vazhdojë të ketë rol qendror në politikën serbe.
Zgjedhjet e tetorit pritet të jenë një test i rëndësishëm për stabilitetin politik të Serbisë dhe marrëdhëniet e saj me Bashkimin Evropian.
(Unaza Onlline)